የአብክመ ኢንዱስትሪና ኢንቨስትመንት ቢሮ

ቢሮው የክልሉን የኢንቨስትመንት እንቅስቃሴ በባለቤትነት የመምራትና የማስተባበር ተልዕኮውን ለመወጣት እንዲችል የኢንዱስትሪና ኢንቨስትመንት ዘርፍ እንዳለፉት ጊዜያት ሁሉ በቀጣዮቹ ዓመታትም በዋነኝነት  ሰፊ የሰው ሀይል፣ የአገር ውስጥ ምርቶችን በጥሬ ዕቃነት በስፋት በሚጠቀሙ፣ የቴክኖሎጂ ሽግግር የሚያደርጉ፣ ወጪ ምርቶችን በስፋት የሚልኩ እና የገቢ ምርቶችን በመተካት የውጭ ምንዛሪ የሚያስገኙ የኢንቨስትመንት ዘርፎች ላይ በማተኮር የሚሰራ ነው፡፡

ክልሉ በተለያዩ አካባቢዎች ክልሉን ብሎም ሃገርን ሊለውጡ የሚችሉ የተለያዩ አይነት ፀጋዎች እንዳሉት ይታወቃል፡፡ ስለሆነም እያንዳንዱ አካባቢ ያለውን ሀብት መሰረት አድርጎ በየትኛው ዘርፍ ቅድሚያ ሰጥቶ መስራት እንዳለብን የሚያመላክት ፍኖተ ካርታ ማዘጋጀት አስፈላጊ በመሆኑ የትኩረት ዘርፎችንና አካባቢዎችን/ቦታዎችን በ6 ዋና ዋና ቀጠናዎች ማለትም ተከዜ ተፋሰስ፤ሰሜን ምዕራብ አማራ፤ደቡብ ምዕራብ አማራ፤የአባይ ሸለቆ፤ምስራቅ አማራ እና የጣና መቀነት በሚል የለየ አንድ የክልሉ ኢንዱሰትሪና ኢንቨስትምንት ፍኖተ-ካርታ ተዘጋጅቷል፡፡ከዚህ በተጨማሪ በተለዩ ቀጠናዎች ውስጥ ከአሁን በፊት የአዋጭነት ጥናት የተሰራላቸው የተለያዩ ፕሮጀክቶችን ወቅታዊ የማድረግ ስራ እየተሰራ ይገኛል፡፡